හිටපු පාර්ලිමේන්තු මන්ත්‍රී ජොන්ස්ටන් ප්‍රනාන්දු මහතා ලියාපදිංචි නොකර නීති විරෝධීව භාවිතා කර බවට චෝදනා එල්ල වූ සුඛෝපභෝගී මෝටර් රථය එංගලන්තයේදී සොරකම් කළ එකක් බව හෙළිව තිබේ.
අධිකරණය හමුවේ කරුණු වාර්තා කළ විමර්ශණ නිලධාරීන් පැවසුයේ අදාල රථයේ කැසි අංකය ජාත්‍යන්තර දත්ත පද්ධතිය හරහා පරීක්ෂා කිරීමේදී මෙම රථය එංගලන්තයේදී 2021 වසරේ සොරකම් කරන ලද එකක් බවයි.
අදාළ රථය ළඟ තබා ගැනීමේ සිදුවීම සම්බන්ධයෙන් අත්අඩංගුවට ගත ජොන්ස්ටන් ප්‍රනාන්දු මහතා ඔක්තෝබර් මස තිස් වැනි දක්වා රක්ෂිත බන්ධනාගාර කරන ලදී.
අදාළ වාහනය සොරා ගන්නා ලද අංක තහඩුවක් සමග භාවිතා කර ඇති බවත් එය මෙරටට ආනයනය කල එකක් නොවන බව රේගුවේ දත්ත පද්ධතිය හරහා හෙළිව ඇති බවත් විමර්ශන නිලධාරින් අධිකරණයට කරුණු වාර්තා කළේය.
කෙසේ වෙතත් සැකකාර ජෝන්ස්ටන් ප්‍රනාන්දු මහතාගේ නීතිඥයා අධිකරණයේදී කියා සිටියේ මෝටර් රථය එංගලන්තයෙන් සොරකම් කරන ලද බව පැවසුවත් එම සොරකමට තම සේවා දායකයා සම්බන්ධ බව ඔප්පු කිරීමට ප්‍රමාණවත් සාක්ෂි නැති නිසා ඔහුට මුල්‍ය විශුද්ධිකරණ පනත යටතේ චෝදනා ගොනු කළ නොහැකි බවය.