පසුගිය වසරේදී (2023) පමණක් රුධිර පාරවිලයන කටයුතුවලදී එච්. අයි. වී ආසාදිතයින් 1327 දෙනෙකු දිවයිනෙන් වාර්තා වී තිබේ.
ජාතික ඒඩ්ස් මර්ධන දිනය නිමිත්තෙන් සංවිධානය කරන ලද වයඹ පළාත් ඒඩ්ස් මර්ධන වැඩසටහනට සහභාගි වෙමින් කුරුණෑගල ශික්ෂණ රෝහලේ ලිංගාශ්‍රිත රෝග පිළිබඳ විශේෂඥ වෛද්‍ය චිත්‍රාන් හතුරුසිංහ ප්‍රකාශ කළේ පසුගිය 2023 වසරේදී දිවයිනේ ඒඩ්ස් රෝග ව්‍යාප්තිය සියයට 27කින් ඉහළ ගොස් ඇති බවය.
“මෙම රෝගයට වයස අවුරුදු 15 සිට 29 දක්වා වයස්වල තරුණයන් ගොදුරු වීම ඉතාම අවාසනාවන්ත තත්ත්වයක් බව පේනවා. පසුගිය 2003 වසරේ සිට එච්අයිවී ඒඩ්ස් රෝග ව්‍යාප්තිය ක්‍රම ක්‍රමයෙන් ඉහළ යමින් තිබෙනවා. වසර 2030 දී මෙම රෝගය තුරන් කිරීම සඳහා අපි හඳුනාගත්තු ක්‍රමවේදයක් තිබෙනවා. පළමු අවස්ථාවේදීම අපි රෝගය හඳුනා ගත්තොත් මේ රෝගීන්ගෙන් සියයට 95ක් පමණ ප්‍රතිකාර සඳහා යොමු කිරීමට අපිට හැකියාව තිබෙනවා. මේ රෝගින්ගෙන් සියයට 95 ක්ම රෝගී වයිරසය බිංදුව බවට පත්කර ගත්තොත් අපිට සාර්ථක වෙන්න පුළුවන්. නමුත් අපි මෙවැනි රෝගීන් හඳුනාගැනීමේ අපි ඉන්නේ සීයට 82ක පමණ සීමාවක. ඒඩ්ස් රෝග ආසාදිතයින් පමණක් නොවෙයි උපදංශය වැනි සමාජ රෝග වලට ගොදුරු වූවන්ද රුධිර පාරවිලයන කටයුතු වලදී හමුවී තිබෙනවා. වෛද්‍ය වෘත්තීකයන් විදිහට මේ රෝග තත්ත්වයන් වළක්වා ගැනීමට කොපමණ මහන්සි ගත්තත් වැඩක් නැහැ ඒ සඳහා අවශ්‍ය දේශපාලන සහාය නොලැබෙනවා නම්. මෙවැනි වැඩසටහනක් සාර්ථක කර ගැනීමටනම් ඒ සඳහා දේශපාලන සහාය අවශ්‍යමයි.”